محتسبین: خپل منځي شخړې نوی نسل د بدیو دوام ته هڅوي چې باید ډډه ترې وشي
د امربالمعروف، نهې عن المنکر او شکایتونو اورېدلو وزارت اړوند د فراه ولایت محتسبینو د سیمې د دیني عالمانو او قومي مخورو په منځګړیتوب د دوو قومونو ترمنځ(۱) کلنه دښمني چې د ګڼ شمېر ستونزو، ناخوالو او د دواړو قومنو ترمنځ د اړیکو پرې کېدو لامل شوې وه په دوستۍ بدله کړه.
په دې پار جوړې شوې ناستې ته، محتسبینو پخپلو خبرو کې د یووالي پر ارزښت خبرې وکړې او ویې ویل، خپل منځي شخړې نوی نسل د بدیو دوام ته هڅوي، ټولنه د بې اتفاقۍ لور ته ټېل وهي او د خلکو ژوند له ګواښ سره مخ کوي چې باید مخه یې ونیول شي.
محتسبینو همدا راز زیاته کړه ، د اسلامي امارت د هرې برخې مسؤلین هڅه کوي تر څو د هېواد والو له پاره د ارام ژوند تېرولو زمینه برابره کړي او چاته دا اجازه نه ورکوي چې ګډوډیو او بې اتفاقیو ته لار هواره کړي.
ورته مهال دیني عالمانو، قومي مخورو او د پېښې ښکېلو اړخونو هم د امر بالمعروف وزارت د محتسبینو اصلاحي کړنې وستایلې او زیاته یې کړه چې مسؤلین، قومي مخور او متنفذین باید د خلکو ترمنځ د شته ستونزو د هواري لپاره خپلې هڅې جاري وساتي.
دا په داسې حال کې ده چې تر دې وړاندې هم د د ې ولایت د امربالمعروف ریاست محتسبینو پخپلو هڅو په ټولنه کې د بدیو مخه نیولې چې ځایي خلک یې له کړنو هر کلی کوي.
