پلازمېنه کابل او کونړ ولایتونو کې دوه مېرمنې له اجباري نکاح څخه وژغورل شوې
د امربالمعروف، نهې عن المنکر او شکایتونو اورېدلو وزارت اړوند د پلازمېنې کابل او کونړ ولایتونو محتسبینو د مېرمنو حقونو ته په ژمنیتا دوه مېرمنې له اجباري نکاح څخه وژغورلې.
یادې مېرمنې چې د ناوړه دودونو او زیاتو پیسو په بدل کې د هغوی له خوښې پرته په نکاح ورکول کېدلې وروسته له هغه یې مخه ونیول شوه، چې نوموړې مېرمنې د یادو ولایتونو اړوند د امربالمعروف ریاستونو ته د قضیو د حل په موخه عارضې شوې.
بل خوا ځایي اوسېدونکي په ټولنه کې د محتسبینو له لوري د معروفاتو د اقامې، منکراتو د مخنیوي او د مېرمنو له شرعي حقونو دفاع او ورکړې په موخه کړنې ستایي او ډاډ څرګندوي چې له دې سره به په ټولنه کې د زیاتو ناوړه دودونو او غیر شرعي کړنو مخه ونیول شي.
دا په داسې حال کې ده چې د امربالمعروف، نهې عن المنکر او شکایتونو اورېدلو وزارت محتسبینو د هېواد په ډېری ولایتونو کې د مېرمنو اړوند کورني تاوتریخوالي، مهر، میراث او د خاوند له لوري د نفقې نه ورکړې سل ګونه له تاوتریخوالي ډکو پېښو مخه نیولې او په دې پار به یې کړنې لا هم دوام ولري.
