د میدان وردګ ولایت محتسبینو یوه مېرمن له کورني تاوتریخوالي وژغورله
د میدان وردګ ولایت محتسبینو د دې ولایت په سید آباد ولسوالۍ کې د ټولنې اصلاح او د مېرمنو حقونو خوندیتوب ته په ژمنتیا یوه مېرمن له کورني تاوتريخوالي وژغورله.
د یاد ولایت د امربالمعروف ریاست د مسؤولینو په وینا، یاده مېرمن چې د خپل خاوند او خسرګنۍ له لوري له فزیکي او رواني زورونې سره مخ وه، د محتسبینو له لوري وژغورل شوه او د کورنۍ غړو ته یې د مېرمنو د حقونو په تړاو بشپړ معلومات ورکړل او له هغوی یې ژمنه واخیسته تر څو په راتلونکي کې له ورته عمل څخه ډډه وکړي او د یادې مېرمنې ټول شرعي او انساني حقوق به ورکوي.
محتسبین زیاتوي، د مېرمنو پر وړاندې تاوتریخوالی، د هغوی د حقونو لکه میراث، مهر، د خاوند له لوري د نفقې نه ورکول او له هغوی سره هر ډول ناوړه چلند تر سره کول د اسلام په مبارک دین کې ناروا بلل شوي دي، هېچا ته به اجازه ور نه کړي چې د مېرمنو شرعي حقونه تر پښو لاندې کړي.
