د امر بالمعروف وزارت له لوري د امارتي ادارو او اتحادیو له غړو سره د قانون د لا ښه تنفیذ په موخه ناسته وشوه
د امر بالمعروف، نهی عن المنکر او شکایتونو اورېدلو وزارت له لوري د دې وزارت د پالیسي او مسلکي معین په سرپرستۍ د ټولو امارتي ادارو او د پلازمېنې کابل ښار د ټولو اتحادیو له غړو سره د امر بالمعروف، نهی عن المنکر او شکایتونو اورېدلو وزارت د قانون د لا ښه تنفیذ، همغږۍ او په یادو برخو کې د وزارت له لوري د شوو سپارښتنو د پلي کولو په موخه ناسته وشوه.
د ناستې د پیل په خبرو کې د امر بالمعروف وزارت د پالیسي او مسلکي مرستیال راغلیو کسانو ته د ښه راغلاست تر څنګ وویل: د امیر المؤمنین حفظه الله له لوري د امربالمعروف وزارت لپاره د تصویب شوي قانون مسؤلیت یوازي د امربالمعروف وزارت مسؤلیت نه دی، بلکي د هر مسؤل مسؤلیت دی چې د دې قانون په تنفیذ کې برخه واخلي.
د ښاغلي حقاني په وینا، کفار هڅه کوي تر څو په اسلامي ټولنو کې اسلامي کلتور حجاب له منځه یوسي او پر ځای یې خپل غربي کلتور دود کړي، چې مخنیوی یې زموږ او ستاسې ګډ مسؤلیت دی او په کار ده، چې له کفارو څخه د نظامي ازادۍ تر څنګ فرهنګي او عقیدوي ازادي هم واخلو.
دغه راز ناستې ته د تفتیش او نظارت رئیس مفتي عبدالحمید حماد د کمېټې د پرېکړې په اساس وویل: له دې وروسته باید په ټولو واده تالارونو او هوټلونو کې د ښیځینه مراجعینو لپاره ځانګړي ځایونه جوړ کړل شي او د ډوډۍ وروړلو او نورو اړتیاوو د پوره کولو لپاره باید ښځینه کارمندانې وګمارل شي او د ودونو او نورو خوښیو پر مهال دې د موسیقي له غږولو او هر ډول نشه یي موادو له کارولو ډډه وشي.
ښاغلي حماد زیاته کړه، چې ټولو تفریحي پارکونو او په تفریحي ځایونو کې هوټلونو ته د ښځینه وو ورتګ په مکمل ډول منع دی او له دې وروسته هېڅ ښځینه نشي کولی چې تفریحي پارکونو ته لاړې شي.
د ناستې په پای کې د ناستې ګډون والو د امر بالمعروف وزارت د قانون تنفیذ خپل دیني او هېوادنی مسؤلیت یاد کړ او ژمنه یې وکړه، چې د قانون په تنفیذ، معروفاتو اقامې او د منکراتو په مخنیوي کې د محتسبینو تر څنګ ولاړ دي.
