خوست کې د محتسبینو په هڅو یوه مېرمن له ۱۴ کلونو وروسته له شرعي حقونو برخمنه شوه
د امر بالمعروف، نهې عن المنکر او شکایتونو اورېدلو وزارت اړوند د خوست ولایت محتسبینو په هڅو یوه مېرمن، چې له تېرو ۱۴ کلونو راهیسې له خپلو ټولو شرعي حقونو څخه بې برخې او له جدي کورني تاوتریخوالي سره مخ وه له خپلو شرعي حقونو څخه برخمنه شوه.
د محتسبینو په وینا: یاده مېرمن چې له اوږدې مودې راهیسې د خپل خاوند له لوري د بې معنی غیرتونو او ناوړه دودنو پر اساس ځورول کېدله او له جدي کورني تاوتریخوالي سره مخ وه، د محتسبینو په هڅو د دې غیر شرعي عمل مخه ونیول شوه.
محتسبین ډاډ څرګندوي، چې په پوره توان به د مېرمنو له شرعي حقونو څخه دفاع کوي او د هغو ناسمو دودونو مخه به نیسي چې له امله یې د مېرمنو شرعي حقوق له ګواښ سره مخ دي.
د یادولو وړ ده، چې د دې وزارت محتسبینو د مېرمنو د نورو حقونو لکه میراث، ولور، نفقې او خپلې خوښې نکاح تر څنګ لسګونه مېرمنې له کورني تاوتریخوالي او کورنیو بندخونو څخه ژغورلې دي.
