محتسبین: د مېرمنو د شرعي حقونو نه ورکړه غیر شرعي عمل او د انساني کرامت سپکاوی دی
د غزني ولایت د امر بالمعروف ریاست محتسبینو د مېرمنو حقونو د خوندیتوب په موخه د دې ولایت په زنه خان ولسوالۍ کې یوه مېرمن، چې له تېرو ۱۵ کلونو راهیسې د خپل خسر له لوري، له فزیکي او رواني ځورونو سره مخ وه وژغورله او له خپلو شرعي حقونو څخه برخمنه شوه.
محتسبین وایي: یاده مېرمن، چې د زنه خان ولسوالۍ د راحت خېلو د کلي اوسېدونکې ده، چې له تېرو ۱۵ کلونو راهیسې د خپل خسر له لوري له جدي کورني تاوتریخوالي سره مخ او له ټولو شرعي حقونو څخه بې برخې وه د محتسبینو په هڅو له شرعي حقونو څخه برخمنه شوه.
ورته مهال د یاد ولایت محتسبینو په یوه بل غوره اقدام کې، د دې ولایت په جاغوري، خواجه عمري او ګیلان ولسوالیو کې څلور مېرمنې له کورني ظلم څخه ژغورلې دي.
د یادولو وړ ده، چې د امر بالمعروف، نهې عن المنکر او شکایتونو اورېدلو وزارت مسؤلین د مېرمنو د حقونو نه ورکړه غیر شرعي عمل بولي او دا چاره د انساني کرامت سپکاوی یادوي.
