کونړ کې محتسبینو د مرکز په ګډون په اووه ولسوالیو کې د قانون د تطبیق په موخه ناستې وکړې
د کونړ ولايت د امر بالمعروف ریاست محتسبینو د مرکز په ګډون په(۷) ولسوالیو کې د امیر المؤمنین حفظه الله د ځانګړي فرمان ( د انساني قاچاق او په ټولنه کې د ناوړه دودونو د مخنیوي په موخه) له دیني عالمانو، قومي مخورو او ځوانانو سره د امر بالمعروف وزارت د قانون د تطبیق په موخه ناستې وکړې.
محتسبینو له ځایي خلکو وغوښتل، چې په ودونو او نورو خوښیو کې د هر ډول ناوړه دودونو له کولو ډډه وکړي او خپلې ورځنۍ کړنې د شریعت د لارښوونو په اساس تر سره کړي ، څو د اسلامي ارزښتونو د پیاوړتیا تر څنګ د خلکو ترمنځ د ورورولۍ او همغږۍ فضا نوره هم پیاوړې شي.
دغه راز محتسبینو پر دیني عالمانو غږ وکړ، چې د منبرونو له لارې خلکو ته د امر بالمعروف وزارت قانون بیان کړي تر څو په ټولنه کې د شته منکراتو مخه په ښه ډول ونیول شي.
دا په داسې حال کې ده، چې د هېواد په کچه د محتسبینو له لوري د قانون د تطبیق په موخه ناستې روانې دې، چې ور سره په ټولنه کې د منکراتو په مخنیوي کې د پام وړ بدلون راغلی.
