ارزګان کې د محتسبینو په هڅو یوه نجلۍ بېرته له خپلې کورنۍ سره یو ځای شوه
د ارزګان ولایت د امر بالمعروف، نهی عن المنکر او شکایتونو اورېدلو ریاست محتسبینو د دې ولایت په مرکز تریتکوټ کې د امنیتي ارګانونو د ښځینه پولیسو په همکارۍ یوه ځوانه نجلۍ چې د یو ځوان له لوري تښتول شوې وه او په غیر شرعي توګه یې پخپل کور کې ساتله د محتسبینو په هڅو ازاده او له خپلې کورنۍ سره یو ځای شوه.
په دې تړاو د یاد ولایت د امر بالمعروف مسؤلین وایي: یاده ځوانه نجلۍ چې د یو ځوان له لوري له خپل کور څخه تښتول شوې وه او په غیر شرعي توګه یې پخپل کور کې په پټه ساتله د محتسبینو له لوري د ښځینه پولیسو په همکارۍ بېرته له خپلې کورنۍ سره یو ځای شوه او مجرم کس د نورو څېړنو په موخه عدلي او قضایي ارګانونو ته ور وپېژندل شو.
مسؤلین زیاتوي، چې یاده نجلۍ د هغې له خوښې پرته د کوډو او جادو په وسیله له خپل کور څخه را وتلې وه له نوموړي کس سره د کوډو او جادو ګڼ شمېر وسایل هم نیول شوي دي.
د یادولو وړ ده، چې د امر بالمعروف، نهی عنالمنکر او شکایتونو اورېدلو وزارت مسؤلین د مېرمنو د حقونو خوندیتوب خپل لومړیتوب ګني او ډاډ څرګندوي چې هېڅ چا ته به اجازه ورنکړي څو د مېرمنو حقونه تر پښو لاندې کړي.
