غزني کې د محتسبینو په هڅو یوه مېرمن له ۳۰ کلن کورني تاو تریخوالي وژغورل شوه
د غزني ولایت د امر بالمعروف، نهی عن المنکر او شکایتونو اورېدلو ریاست مسؤلینو د خپلو کړنو پر مهال یوه مېرمن، چې له تېرو (۳۰) کلنو راهیسې د خسرګنۍ له لوري له ناوړه چلند او کورني تاوتریخوالي سره مخ وه وژغورله او له خپلو شرعي حقونو څخه برخمنه شوه.
مسؤلین وایي: یاده مېرمن چې د خپلې خسرګنۍ له لوري له تېرو ۳۰ کلونو راهیسې له رواني او فزیکي ظلم سره مخ وه د محتسبینو په هڅو وژغورل شوه.
دغه راز محتسبینو د نوموړې مېرمنې له خاوند او د خسرګنۍ له غړو وغوښتل چې په راتلونکي کې د داسې ناوړه کړنو له تر سره کولو ډډه وکړي او د مېرمنو پر وړاندې د تاوتریخوالي ډک چلند له کولو څخه لاس واخلي.
د یادولو وړ ده، چې د دې ولایت محتسبینو تر دې وړاندې هم د مېرمنو د حقونو اړوند سلګونه قضیې حل کړې دي او په دې تړاو یې له ځایي خلکو سره اصلاحي ناستې کړې دي.
