محتسبینو په پکتیکا کې یوه مېرمن له غیر شرعي نکاح څخه وژغورله
د پکتیکا ولایت د امر بالمعروف، نهی عن المنکر او شکایتونو اورېدلو ریاست محتسبینو د مېرمنوحقونو ته په ژمنتیا د دې ولایت په برمل ولسوالۍ کې یوه مېرمن له غیر شرعي نکاح څخه وژغورله.
په دې تړاو د یاد ولایت محتسبین وایي: یاده مېرمن چې د کورنۍ غړو یې غوښتل د هغې له خوښتې پرته یې په جبري توګه په نکاح کړي، چې د یادې ولسوالۍ محتسبینو پر یاده قضیه له خبرېدو وروسته د مېرمنې د شرعي حق د ورکړې په موخه یاده مېرمن له اجباري نکاح څخه وژغورله.
محتسبین ډاډ څرګندوي چې د ټولنې د شرعي او اخلاقي ارزښتونو د خوندي ساتلو لپاره به خپلې هڅې لا نورې هم ګړندۍ کړي.
بلخوا ځایي اوسېدونکي دا پرېکړه د مېرمنو پر وړاندې له تاوتریخوالي د ډکو پېښو د مخنیوي او په ځانګړي ډول د جبري ودونو د مخنیوي غوره ګام بولي.
