ننګرهار کې د امر بالمعروف مسؤلینو دوه مېرمنې له دوه کلن کورني ظلم څخه وژغورلې
د ننګرهار ولایت د امر بالمعروف،نهی عن المنکر او شکایتونو اورېدلو ریاست مسؤلینو دوه هغه مېرمنې له کورني ظلم څخه وژغورلې چې له تېرو دوو کلونو راهیسې د خاوندانو د ناوړه چلند له امله د خپلو پلارونو په کورونو کې اوسېدلې او بې سر نوشته پاتې وې.
په دې تړاو د یاد ولایت مسؤلین وایي: یادې مېرمنې چې له تېرو دوو کلونو راهیسې د خپلو خاوندانو او د هغه د کورنۍ لهخوا له فزیکي او رواني تاوتریخوالي، ناوړه چلند او وهلو ټکولو سره مخ وې او له ټولو شرعي حقونو څخه بې برخې وې د محتسبینو په هڅو له شرعي حقونو څخه برخمنې شوې.
محتسبینو د یادو مېرمنو د خسرګنۍ له غړو سره په اصلاحي ناستو کې د اسلام په مبارک دین کې د مېرمنو د حقونو په تړاو خبرې وکړې او له هغوی څخه یې ژمنه واخیسته، چې په راتلونکي کې د داسې ناوړه کړنو له تر سره کولو ډډه وکړي.
د یادولو وړ ده، چې د یاد وزارت محتسبینو د هېواد په کچه تېره عقرب میاشت کې د مېرمنو (۱۲۴) بېلا بېلو قضیو ته رسېدنه کړې او ډاډ څرګندوي چې په پوره توان به د هغو ټولو بدو پېښو مخه نیسي، چې له امله یې د مېرمنو شرعي حقوق له ګواښ سره مخ وي.
