پکتیکا کې د محتسبینو په هڅو (۴۵)کلنه دښمني حل شوه
د پکتیکا ولایت د امر بالمعروف، نهی عن المنکر او شکایتونو اورېدلو ریاست محتسبینو د دې ولایت په نعمت اباد ولسوالۍ کې د خپل دیني، اخلاقي او ټولنیز مسئولیت له مخې د دیني عالمانو او قومي مخورو په منځګړیتوب د دوو کورنیو تر منځ د اوبو پر سر راپورته شوې (۴۵) کلنه دښمني چې د زیاتو ناخوالو او ستونزو لامل شوې وه حل او د دواړو کورنیو ترمنځ یې روغه وکړه.
دا اوږد مهاله دښمني، چې د یادو کورنیو تر منځ چې نیمه پېړۍ یې دوام وکړ او د دوامداره شخړو لامل شوې وه، د یاد ولایت محتسبینو د سیمې د دیني عالمانو او قومي مخورو په منځګړیتوب حل او پر دوستۍ بدله کړه.
د روغې جوړې په پار جوړې شوې ولسي ناستې ته د یاد ولایت محتسبینو، دیني عالمانو او قومي مخورو د اسلام په مبارک دین کې د یووالي پر ارزښت خبرې وکړې او ویې ویل، چې د اسلام مبارک دین موږ ته له ټولو قومي او ژبني تعصباتو لرې د ورور ولۍ په فضا کې د ژوند کولو امر کړی دی، چې باید پخپلو کې له یو بل سره د وروڼو په څېر چلند وکړو.
د یادولو وړ ده، چې د امربالمعروف، نهی عن المنکر او شکایتونو اورېدلو وزارت ولایتي مسؤلینو تېره اونۍ هم نهه لویې دښمنۍ او (۳۸) وړې شخړې حل او پر دوستۍ بدلې کړې وې.
