د هېواد په خوست، غزني او تخار ولایتونو کې څلور مېرمنو د شرعي نکاح حق تر لاسه کړ
د امر بالمعروف،نهی عن المنکر او شکایتونو اورېدلو وزارت محتسبینو په خوست، غزني او تخار ولایتونو کې څلور مېرمنې چې له اوږدې مودې راهیسې د نکاح له شرعي حقوقو څخه بې برخې وې او د ناوړه دودنو په اساس ځورول کېدلې له اوږده محرومیت څخه وژغورلې او د شرعي نکاح حقوقو څخه یې برخمنې کړې.
محتسبین وایي: یادې مېرمنې چې د خپلو پلرونو لوري ترې د شرعي نکاح حق اخیستل شوی وو او معلقه پاتې وې د محتسبینو په هڅو له اوږد مهاله محرومیت څخه خلاصې او له خپلو شرعي حقونو څخه برخمنې شوې.
مسؤلین زیاتوي: د مېرمنو خوښه په نکاح کې د هغوی شرعي حق دی، چې باید ترې برخمنې شي، چې په وینا یې: «هیڅ چاته به اجازه ور نه کړو، چې د مېرمنو حقوق تر پښو لاندې کړي او د هغو پېښو مخه به نیسو چې د مېرمنو حقوق ګواښي».
بل خوا ځایي اوسېدونکي په ټولنه کې د معروفاتو اقامې، منکراتو مخنیوي او د مېرمنو له شرعي حقونو دفاع او ورکړې په برخه کې د محتسبینو کړنې ستایي او ډاډ څرګندوي چې له دې سره به په ټولنه کې د زیاتو ناوړه دودونو او غیر شرعي کړنو مخه ونیول شي.
