غزني کې محتسبینو د څلور کلنې نجلۍ د غیر شرعي نکاح مخه ونیوله
د امر بالمعروف، نهې عن المنکر او شکایتونو اورېدلو وزارت اړوند د غزني ولایت د امر بالمعروف مسؤلینو د څلور کلنې نجلۍ د غیر شرعي او ناروا نکاح مخه ونیوله، چې د کورنۍ غړو یې غوښتل یوه ۳۹کلن معیوب کس ته یې د زیاتو پیسو په بدل کې په نکاح کړي.
یاده نجلۍ، چې د ناوړه دودونو او زیاتو پیسو په بدل کې یوه معیوب کس په نکاح ورکول کېده؛ وروسته له هغه یې مخه ونیول شوه، چې محتسبینو پر یاده قضیه له خبرېدو وروسته د مېرمنو د شرعي حق د ورکړې په موخه نوموړې نجلۍ له غیر شرعي نکاح څخه وژغورله.
بل خوا ځایي اوسېدونکي په ټولنه کې د معروفاتو اقامې، منکراتو مخنیوي او د مېرمنو له شرعي حقونو دفاع او ورکړې په برخه کې د محتسبینو کړنې ستایي او ډاډ څرګندوي چې له دې سره به په ټولنه کې د زیاتو ناوړه دودونو او غیر شرعي کړنو مخه ونیول شي.
دا په داسې حال کې ده، چې د امر بالمعروف، نهې عن المنکر او شکایتونو اورېدلو وزارت محتسبینو د هېواد په ډېری ولایتونو کې د مېرمنو د حقونو اړوند نا خوښه ودونې، کورني بند خونو، کورني تاوتریخوالي، ولور او میراث سلګونه قضیې حل کړې دي او په دې پار یې کړنې لا هم دوام لري.
