محتسبینو په پکتیا او پکتیکا ولایتونو کې اته مېرمنې د شرعي نکاح له حقوقو څخه برخمنې کړې
د امر بالمعروف، نهی عن المنکر او شکایتونو اورېدلو وزارت اړوند د پکتیا او پکتیکا ولایتونو محتسبینو په مرکز او ولسوالیو کې اته مېرمنې، چې د کورنیو ستونزو او ناوړه دودونو پر اساس د نکاح له شرعي حقوقو څخه بې برخې وې او د کورنیو غړو یې د شرعي نکاح کولو اجازه نه ورکوله د محتسبینو په هڅو برخمنې شوې.
د امر بالمعروف مسؤلین وایي: یادې مېرمنې، چې له اوږدې مودې راهیسې د کورنیو غړو له خپل ځان سره ساتلې وې او د شرعي نکاح حق یې ور څخه اخیستی و د محتسبینو په هڅو له اوږد مهاله محرومیت څخه خلاصې او له خپلو شرعي حقونو څخه برخمنې شوې.
مسؤلین زیاتوي: د مېرمنو خوښه په نکاح کې د هغوی شرعي حق دی، چې باید ترې برخمنې شي، چې په وینا یې: «هیڅ چاته به اجازه ور نه کړو، چې د مېرمنو حقوق تر پښو لاندې کړي او د هغو پېښو مخه به نیسو چې د مېرمنو حقوق ګواښي».
بل خوا ځایي اوسېدونکي په ټولنه کې د معروفاتو اقامې، منکراتو مخنیوي او د مېرمنو له شرعي حقونو دفاع او ورکړې په برخه کې د محتسبینو کړنې ستایي او ډاډ څرګندوي، چې له دې سره به په ټولنه کې د زیاتو ناوړه دودونو او غیر شرعي کړنو مخه ونیول شي.
