د هېواد په اووه ولایتونو کې (۳۵) مېرمنې له بېلا بېلو ظلمونو څخه وژغورل شوې
د امر بالمعروف، نهې عن المنکر او شکایتونو اورېدلو وزارت محتسبینو په پکتیکا، زابل، تخار، بغلان، فاریاب، ننګر هار او خوست ولایتونو کې د مېرمنو د حقونو ورکړې او په دې برخه کې د ناوړه کړنو د مخنیوي په موخه (۳۵) مېرمنې، چې د ناوړه دودونو پر اساس له ستونزو سره مخ وې او له خپلو شرعي حقونو څخه بې برخې وې له شرعي حقونو برخمنې کړې.
د محتسبینو په وینا: یادې مېرمنې چې کورني ظلم، نفقې نه ورکړې، روحي او فزیکي ځورونې او ورته ناوړه پېښو سره مخ وې د محتسبینو په هڅو وژغورل شوې.
محتسبین زیاتوي، چې په پوره توګه د مېرمنو د شرعي حقونو ورکړې ته ژمن دې او هېڅ چاته به اجازه ور نکړي چې د مېرمنو شرعي حقوق تر پښو لاندې کړي.
د یادولو وړ ده، چې د یاد وزارت محتسبینو د هېواد په کچه، د مېرمنو حقونو ته د رسېدنې په برخه کې زرګونه بېلا بېلو قضیو ته رسېدنه کړې، چې پکې د میراث، کورني تاوتریخوالي، ولور، په بدو کې ورکړې او غیر شرعي نکاح ګانو قضیې حل شوې دې.
