د امر بالمعروف وزارت له لوري د اووه زونونو (۵۵۰) مبلغینو ته درې ورځنی روزنیز سمینار پای ته ورسېد
د امر بالمعروف، نهی عن المنکر او شکایتونو اورېدلو وزارت د رهبرۍ له لوري (۵۵۰) مبلیغینو ته د عالیقدر امیرالمؤمنین حفظه الله له لوري د جوړ شوي قانون او نصاب د تشریح او په دعوتي برخه کې د ګډې همکارۍ په موخه جوړ شوی درې ورځنی روزنیز سمینار پای ته ورسېد.
د دې درې ورځني روزنیز سمینار وروستۍ ناستې ته د امر بالمعروف، نهی عن المنکر او شکایتونو اورېدلو وزارت وزیر شیخ الحدیث محمد خالد الحنفي صاحب د ګډون پر مهال د سمینار ګډون والو ته د ښه راغلاست تر څنګ وویل: هر داعي باید د الله جل جلاله له دین څخه خبر وي او د هغه پر اساس د ټولنې د سمون په موخه کړنې تر سره کړي. چې په وینا یې، د دعوت په چارو کې له سختئ کار مه اخلئ، عامو خلکو ته بشارت ورکوئ او په نرمۍ یې د شريعت پلي کولو ته رابولئ.
شیخ صاحب وویل: د اسلامي امارت ټولې ادارې له مبلغینو سره بشپړې همکارې او د هغوی په چوپړ کې دي، له تاسو څخه مو هم هیله ده،چې د ټولنې ټولو اقشارو ته اسلامي شريعت او ارزښتونه په ښه توکه ورسوئ او پلي کولو ته یې راوبولئ.
دغه راز د ناستې په پای کې شیخ الحدیث مولوي محمد خالد الحنفي صاحب وویل، نړیوال هېڅ حق نه لري چې زموږ په داخلي کړنو کې لاس وهنه وکړي؛ زموږ د ټولنې معنوي جوړښت او سمونه زموږ او ستاسې شریک مسؤلیت دی، چې باید په ښه توګه یې تر سره کړو.
