د امر بالمعروف، نهی عن المنکر او شکایتونو اورېدلو وزارت په اونۍ کې
د امر بالمعروف، نهی عن المنکر او شکایتونو اورېدو وزارت مسؤلینو د هېواد په کچه د اسلامي ارزښتونو د پالنې، مېرمنو د حقونو خوندیتوب، د قومي او ژبني دښمنیو د حل، ټولنیز عدالت د ټینګښت او د ټولنیز اخلاقي سمون لپاره د ټاکل شوې پالیسي پر اساس کړنې تر سره کړې دې.
د مېرمنو حقونو ته رسېدنه:
دغه راز محتسبینو په دې اونۍ کې د مېرمنو د حقونو اړوند (۹۳) بېلابېلې قضیې حل کړې دي، چې د یادې شمېرې له مخې (۳۷) د کورني تاوتریخوالي، (۸) د میراث، (۱۱) د غیر شرعي نکاح ګانو،(۱۳) د ولور، (۸) د نفقې ورکړې، (۹) مېرمنو ته شرعي نکاح زمینه برابره شوه او د (۷) مېرمنو د طلاق قضیې حل شوې دې.
د قومي دښمنیو حل:
محتسبینو په ټولنه کې د قومي او ژبني تعصباتو د مخنیوي او د یووالي روحیې د پياوړې کولو لپاره د هېواد په کچه (۱۰) دښمنۍ او (۴۰) وړې شخړې حل کړې دي.
د کوډګرو نیول:
د یاد وزارت مسؤلینو په ټولنه کې د ناوړه دودونو د مخنیوي، ټولنیز عدالت د تأمین او د خرافاتو د مخنیوي په موخه (۱۲) تنه کوډګر نیولي او د شرعي پرېکړې په موخه یې، عدلي او قضایي ارګانونو ته ور پېژندلي دي.
له سوداګرو سره ناستې:
او وروستی خبر دا، چې محتسبینو په بازارونو کې د سود، احتکار، ترازو کې د کموالي، د تاریخ تېره او بې کیفیته موادو د خرڅلاو د مخنیوي په موخه له سوداګرو او هټۍوالو سره (۲۱۸) اصلاحي ناستو تر څنګ تر پنځو ټنو زیات تاریخ تېر او بې کیفیته خوراکي او غیر خوارکي توکي هدر کړي دې.
عمومي ناستې
او وروستی خبر دا چې د امر بالمعروف وزارت مسؤولینو د معروفاتو اقامې او منکراتو مخنیوي په موخه د هېواد په کچه له دیني علماوو، قومي مشرانو او د ټولنې له بېلابېلو اقشارو سره څه باندې ۴۰۰ اصلاحي ناستې ترسره کړي دي.
