زابل کې د محتسبینو له لوري د شکایتونو د ثبت اسانتیاوو په موخه د عامه پوهاوي خبرپاڼې خپرې شوې
د زابل ولایت د امر بالمعروف، نهی عن المنکر او شکایتونو اورېدلو ریاست مسؤلینو له لوري د ولسي خلکو د حقونو خوندیتوب او او شته ستونزو ته د پر وخت رسېدنې او عامه پوهاوي په موخه خبر پاڼې د مرکز قلات ښار او اړوندو سیمو په بېلابېلو عامه ځایونو کې ولګول شوې، تر څو ولسي خلک وکولی شي خپلې ستونزې د حل په موخه د امر بالمعروف تر مسؤلینو ورسوي.
مسؤلین وایي له دې کاره یې موخه داده، څو ولسي وګړي په دې وپوهول شي، چې که هر ملکي وګړی د کومې امارتي ادارې، نظامي ارګان یا مسؤول شخص له لوري له ظلم، د اداري ناسم چلند او یا حق تلفۍ سره مخ شي، کولای شي خپل شکایتونه په رسمي او قانوني ډول د امر بالمعروف وزارت اړوند ولایتي ریاستونو ته د حل په موخه وړاندې کړي.
مسؤلین زیاتوي، چې ولسي وګړي دې د خپلو ستونزو د حل له ټولو قانوني لارو چارو ګټه واخلي تر څو له شرعي اصولو سره سم په ټولنه کې د هر ډول غیر شرعي کړنو او هر ډول ظلم او بې عدالتۍ مخه ونیول شي.
د یادولو وړ ده، چې د عامه پوهاوي او د ولسي خلکو د شکایتونو اورېدلو او حل په موخه د خبر پاڼو د وېش لړۍ د هېواد په ټولو ولایتونو کې روانه ده تر څو ولسي خلک په اسانۍ سره خپلې ستونزې د حل په موخه د امر بالمعروف وزارت اړوند ولایتي مسؤلینو سره شریکې کړي.
