کابل کې یوې ځوانې نجلۍ د خپلې خوښې شرعي نکاح حق تر لاسه کړ
د کابل ولایت د امر بالمعروف، نهی عن المنکر او شکایتونو اورېدلو ریاست مسؤلینو په چهار اسیاب ولسوالۍ کې هغه نجلۍ د خپلې خوښې شرعي نکاح له حقونو څخه برخمنه کړه، چې د کورنۍ غړو یې نه غوښتل چې پخپله خوښه نکاح وکړي.
په دې تړاو د یاد ولایت د امر بالمعروف مسؤلین وایي: د یادې نجلۍ د کورنۍ غړو د بې معنی غیرتونو او ناوړه دودونو په اساس نوموړې مېرمن نه پرېښودله چې د خپلې خوښې نکاح وکړي د محتسبینو په هڅو له اوږد مهاله محرومیت څخه وژغورل شوه او له خپلو شرعي حقونو څخه برخمنه شوه.
مسؤلین زیاتوي: د مېرمنو خوښه په نکاح کې د هغوی شرعي حق دی، چې باید ترې برخمنې شي، چې په وینا یې: «هیڅ چاته به اجازه ور نه کړو، چې د مېرمنو حقوق تر پښو لاندې کړي او د هغو پېښو مخه به نیسو چې د مېرمنو حقوق ګواښي»
بل خوا ځایي اوسېدونکي په ټولنه کې د معروفاتو اقامې، منکراتو مخنیوي او د مېرمنو له شرعي حقونو دفاع او ورکړې په برخه کې د محتسبینو کړنې ستایي او ډاډ څرګندوي چې له دې سره به په ټولنه کې د زیاتو ناوړه دودونو او غیر شرعي کړنو مخه ونیول شي.
