د امر بالمعروف، نهې عنالمنکر او شکایتونو اورېدلو وزارت یو شمېر ریاستونو ته نوي رئیسان ور وپېژندل شول
د امر بالمعروف، نهې عنالمنکر او د شکایتونو اورېدلو وزارت د لزوم دید او وړاندیز له مخې او د ریاست الوزراء عالي مقام د حکم پر بنسټ، د یو شمېر ریاستونو رئیسان تبدیل او نوي ریاستونو ته د یوې معرفت غونډې په ترڅ کې ور وپېژندل شول.
په دغو تبدیليو کې، مولوي نورالرحمن عابد د تدارکاتو مخکنی رئیس د بشري سرچینو ریاست نوي رئیس په توګه، مولوي محمد یحیی عارف د معلوماتي ټکنالوژۍ ریاست مخکنی رئیس د تدارکاتو رئیس په توګه، مولوي عبدالحکیم حقاني د خدماتو ریاست مخکنی رئیس د دیار الهجرت ریاست نوي رئیس په توګه، مولوي ګل محمد حامد د دیار الهجرت مخکنی رئیس د معلوماتي ټکنالوژۍ رئیس په توګه او نصرت ولي نورستانی د بشري سرچینو مخکنی رئیس د خدماتو ریاست رئیس په توګه پر دندو وګمارل شول او په کار یې پیل وکړ.
په دې اړه جوړه شوې غونډه کې د امر بالمعروف، نهې عنالمنکر او د شکایتونو اورېدلو وزارت سرپرست وزیر شیخ محمد خالد الحنفي صاحب وویل: د اسلامي امارت په اداراتو کې د مسؤولینو او کارمندانو ټاکنه، لېږد او تبدیلي یو اصل دی او په اداراتو کې د مثبتو کړنو د ترسراوي او نوښتونو رامنځته کېدو لامل ګرځي.
نوموړي همداراز د نويو معرفي شويو رئیسانو څخه وغوښتل ترڅو په خپلو چارو کې د الله تعالی رضا په پام کې ونیسي او د پخوا په څېر د ټولنې چوپړ ته مټې راونغاړي.
ورته مهال کې نویو پېژندل شویو رئیسانو د امر بالمعروف او نهې عنالمنکر وزارت مقام د لوریینې څخه مننه وکړه او ډاډ یې ورکړ چې په خپلو چارو کې له اخلاص، صداقت او اطاعت څخه کار اخلي.
