خوست کې د محتسبینو په هڅو یوه نجلۍ د شرعي نکاح له حقوقو برخمنه شوه
د خوست ولایت د امر بالمعروف، نهی عن المنکر او شکایتونو اورېدلو ریاست مسؤلینو په هڅو یوه ځوانه نجلۍ، چې له تېرو (۶) کلونو راهیسې د نکاح له شرعي حق څخه بې برخې وه او پلار یې ورته د شرعي نکاح کولو اجازه نه ورکوله د محتسبینو په هڅو له خپل شرعي حق څخه برخمنه شوه.
په دې تړاو د یاد ولایت د امر بالمعروف مسؤلین وایي: یاده نجلۍ، چې پلار یې له تېرو( ۶) کلونو راهیسې له خپل ځان سره ساتلې وه او د شرعي نکاح حق یې ور څخه اخیستی و، چې د محتسبینو په هڅو له اوږد مهاله محرومیت څخه وژغورل شوه او له خپلو شرعي حقونو څخه برخمنه شوه.
مسؤلین زیاتوي: د مېرمنو خوښه په نکاح کې د هغوی شرعي حق دی، چې باید ترې برخمنې شي، چې په وینا یې: «هیڅ چاته به اجازه ور نه کړو، چې د مېرمنو حقوق تر پښو لاندې کړي او د هغو پېښو مخه به نیسو چې د مېرمنو حقوق ګواښي»
بل خوا ځایي اوسېدونکي په ټولنه کې د معروفاتو اقامې، منکراتو مخنیوي او د مېرمنو له شرعي حقونو دفاع او ورکړې په برخه کې د محتسبینو کړنې ستایي او ډاډ څرګندوي چې له دې سره به په ټولنه کې د زیاتو ناوړه دودونو او غیر شرعي کړنو مخه ونیول شي.
