د اطلاعاتو او کلتور وزارت کارکوونکو ته د امر بالمعروف او نهې عن المنکر قانون د توضیح او تشریح ناسته جوړه شوه
د امر بالمعروف، نهې عن المنکر او شکایتونو اورېدلو وزارت له لوري د اطلاعاتو او کلتور وزارت مسؤولینو، رئیس صاحبانو او کارکوونکو ته د امر بالمعروف وزارت پوځي مرستیال شیخ سعید احمد شهید خېل، د اطلاعاتو او کلتور وزارت د فرهنګ معین مولوي عتیق الله عزیزي، د ځوانانو چارو معین مولوي محمد یونس راشد او د مالي، اداري او ګرځندوی معین مولوي قدرت الله جمال په شتون کې د امر بالمعروف او نهې عن المنکر قانون د توضیح او تشریح ناسته جوړه شوه.
د امر بالمعروف وزارت پوځي مرستیال شیخ سعید احمد شهید خېل په خپلو خبرو کې وویل: «امر بالمعروف او نهې عن المنکر قانون د اسلامي شریعت، نبوي احاديثو او حنفي فقهې په رڼا کې جوړ شوی چې پکې د امر بالمعروف، نهې عن المنکر او احتساب د چارو سمون ترڅنګ د ټولنې ټولو وګړو شرعي حقونو سربېره د حیواناتو حقونه ( حیواناتو له جنګولو مخنیوی ترسره شوی ) هم خوندي شوي دي». نوموړي ټينګار وکړ چې د دې قانون له مخې محتسبین مکلف دي ترڅو د ښه چلند، نرمښت او لارښوونو له لارې خپلې چارې مخته یوسي.
شيخ صاحب د خپلو خبرو په دوام کې امر بالمعروف وزارت د اسلامي ارشاداتو او احکامو پلي کوونکې او خپرونکې اداره وبلله؛ زیاته یې کړه چې امر بالمعروف او نهې عن المنکر ترسره کول د ټولو مسلمانانو کډه دیني وجېبه ده.
هغه همدا راز د امارتي ادارو ترمنځ د همغږۍ او همکارۍ پر ارزښت وغږېد او له مسؤولینو یې وغوښتل ترڅو د امر بالمعروف او نهې عنالمنکر قانون د لاښه پلي کېدو او تر ټولنې رسولو کې د یاد وزارت سره همکاري وکړي.
بلخوا د اطلاعاتو او کلتور وزارت مسؤولینو د یادې ناستې په جوړېدا خوښي وښوده او ډاډ یې ورکړ چې د امر بالمعروف او نهې عن المنکر قانون پلي کولو او تر نورو رسولو کې به له هېڅ راز هڅې ډډه ونه کړي.
یاده دې وي چې د ناستې په ترڅ کې د اطلاعاتو او کلتور وزارت کارکوونکو ته د امر بالمعروف او نهې عنالمنکر قانون یو شمېر مادو د توضیح او تشریح ترڅنګ ټولو ګډون والو ته یو یو ټوک قانون هم ورکړل شو.
