د امر بالمعروف او نهی عن المنکر څو پلاویو له ګڼو وزارتونو لیدنه وکړه
د امر بالمعروف او نهی عن المنکر سرپرست وزیر شیخ محمد خالد (الحنفي) په لارښوونه نن د یاد وزارت پلاويو له ګڼو وزارتونو څخه لیدنه وکړه.
دغه لیدنه د معارف وزارت، شهرسازي وزارت، د عدليې وزارت، اوبو او بریښنا وزارت، فوائد عامې وزارت، د کلیو د پراختیا وزارت، سترې محکمې او کابل ښاروالۍ څخه ترسره شوې، چې د امر بالمعروف او نهی عن المنکر وزارت څخه د تفتیش رئیس مولوي فضل ربي، د منکراتو د ازالې رئیس مولوي رازمحمد حامد، د اصلاح او تربیت رئیس مولوي محمد یحیا عارف، د کابل شهري ریاست رئیس مولوي معلم جان مسلم، د شکايتونو د مصوباتو د تطبيق رئس مولوي حجت الله صاحبزاده صاحب او څو نورو کسانو پکې ګډون درلود.
یاد پلاوي په دغو وزارتونو کې له وزیرانو، معینانو د کابل ښاروالۍ معین او د سترې محکمې د دفتر له رئیس سره ولیدل او ترې و یې غوښتل چې باید ټولو شرعي اوامرو پلي کولو ته متوجه شي.
دوی همدا راز یادو وزارتونو کې دخپل وزارت لارښووني په ليکلي بڼه ورته وسپارلې او په دې اړه يي د همکاري غوښتنه ترې وکړه، چې په دولتي ادارو کې ښځینه کارکوونکې بايد شرعي حجاب حتما مراعات کړي، د حجاب نه مراعاتولو په صورت کې بايد منفک شي، نارينه مامورينو کار ځايونه بايد جلا وي، ددولتي مامورينو صورت او سیرت د شريعت مطابق وي، په وزارتونو او رياستونو کې دولتي کارکوونکي لمونځ په جماعت ادا کړي، کم عمره، بې ږيرې کسان په دولتي ادارو کې استخدامول په جدي توګه بند کړي، بې حجابه ښځې دولتي ادارو ته له تللو منع کړي او د فساد مخنیوي ته متوجه شي.
ټولو وزیرانو، معینانو او رئیسانو د همکارۍ ډاډ او اطمینان ورکړ، د نوموړي هيئت په ورتلو يې زياته خوښي څرګنده کړه او د امر بالمعروف په کار يي په جديت ټينګار وکړو.
