د کورني تاوتریخوالي د مخنیوي او د ټولنې د هر وګړي د حقونو د ساتنې لپاره به محتسبین خپلې هڅې روانې وساتي
د فاریاب ولایت د امر بالمعروف، نهې عن المنکر او شکایتونو اورېدلو ریاست محتسبینو په سر اولیا کلی کې یوه میرمن چې له دوو کلونو راهیسې د خپل خاوند له خوا د ظلم، بد سلوک، فزیکي او رواني ځورونو سره مخ وه، له تاوتریخوالي او ناوړه چلند څخه وژغورله.
د محتسبینو د تحقیقاتو په پایله کې څرګنده شوه چې یادې میرمنې ته د ناوړه چلند له کبله سختې ستونزې پېښې شوې وي او له خپلو شرعی حقونو بې برخې ساتل شوې وه.
په همدې پار محتسبینو د کورني تاوتریخوالي د مخنیوي په موخه، د میرمنې خاوند راوغوښت او نوموړي ته يې د شریعت په رڼا کې د ښځو حقوق تشریح کړل او له نوموړي څخه یې په کلکه ژمنه واخیسته چې خپلې میرمنې ته به د اسلامي شریعت له مخې ټول حقوق ورکوي او هېڅ ډول ظلم به ورسره نه کوي.
د یاد ولایت محتسبینو وویل، چې د کورني تاوتریخوالي د مخنیوي او د ټولنې د هر وګړي د حقونو د ساتنې لپاره به محتسبین خپلې هڅې په پراخه کچه روانې ساتي.
