غزني کې محتسبینو د تېلو ټانګونو له مسؤلینو غوښتي چې د لېتر له کموالي او د خرابو تېلو له پلور څخه ډډه وکړي
د غزني ولایت د امر بالمعروف، نهې عن المنکر او شکایتونو اورېدلو ریاست مسؤلینو په بازارونو کې د سود، احتکار، دوکې او وزن کموالي په موخه د خپلو څېړنيزو کړنو پر مهال د مرکز او ولسوالیو په کچه د تېلو له ۲۶۵ پمپونو او تېل خرڅوونکو څخه د تېلو د لېتر د کموالي او د خرابو تېلو د پلورلو د مخنيوي په موخه د څارنې پر مهال له هغوی وغوښتل چې د لېتر له کموالي او د خرابو تېلو له پېر او پلور څخه ډډه وکړي.
د دې څارنې پر مهال د امر بالمعروف مسؤلینو د تېلو پمپونو مسؤلینو ته د لیتر کموالي، د تېلو د کیفیت ټیټوالی او د عیب پټولو څخه د ځان ساتلو په برخه کې د سپارښتنو پر مهال وویل، څو پخپلو سوداګريزو چارو کې اسلامي اصولو ته بشپړه پاملرنه وکړي.
دغه راز مسؤلینو د امر بالمعروف، نهی عن المنکر او شکایتونو اورېدلو وزارت د قانون د(۱۸) مې مادې مطابق د ۳مې او ۴ مې فقرې سره سم د اسلام په مبارک دین کې د اسلامي سوداګرۍ پر ارزښت خبرې وکړې او له هغوی یې وغوښتل، چې خپلې کړنې له اسلامي اصولو سره سمې تر سره کړي.
بل خوا ځایي اوسېدونکي یاد اقدام ستایي او زیاتوي، چې د محتسبینو ورته کړنو په بازارونو کې ګڼ اصلاحات راوستي او اوس د توکو له کیفیت څخه ډاډه دي.
دا په داسې حال کې ده، چې محتسبین وخت ناوخت له بازارانو څخه څارنه کوي او د اصلاحي ناستو پر مهال د سوداګرو او هټۍ والو پام خپلو دیني مکلفیتونو ته را اړوي.
