فراه کې (۷۰) کلن سپین ږیري ته د یوې نجلۍ د اجباري نکاح مخه ونیول شوه
د امربالمعروف، نهې عن المنکر او شکایتونو اورېدلو وزارت اړوند د فراه ولایت محتسبینو د هغې نجلۍ د اجباري نکاح مخه ونیوله چې پلار یې غوښتل خپله لور د هغې له خوښې پرته، یوه (۷۰) کلن سپین ږیري ته د زیاتو پیسو په بدل کې په نکاح ورکړي.
په تړاو یې د یاد ولایت د امربالمعروف رئیس مولوي عبد المجید صمیم وویل ، یاده (۱۸) کلنه نجلۍ چې د فراه ولایت د مرکز کوشیب د کلي اوسېدونکې ده، پلار یې غوښتل چې د زیاتو پیسو په بدل کې یې یوه (۷۰) کلن سپین ږيري ته، د هغې له خوښې پرته په نکاح ورکړي، چې د محتسبینو له لوري د دې ناوړه پېښې مخه ونیول شوه.
ښاغلي صمیم زیاته کړه، د مېرمنو خوښه په نکاح کې د هغوی شرعي حق دی، چې باید ترې برخمنې شي، د هغه په وینا: هیڅ چاته به اجازه ور نه کړي چې د مېرمنو حقوق تر پښو لاندې کړي او د هغو پېښو مخه به نیسي چې د مېرمنو حقوق ګواښي.
دا په داسې حال کې ده، چې د امربالمعروف، نهې عن المنکر او شکایتونو اورېدلو وزارت محتسبینو د هېواد په ډېری ولایتونو کې د مېرمنو د حقونو اړوند اجباري نکاحو، کورني بند خونو، کورني تاوتریخوالي، ولور او میراث سل ګونه قضیې حل کړې دي او په دې پار یې کړنې لا هم دوام لري.
