محتسبینو د هېواد په (۴) ولایتونو کې (۱۲) مېرمنې له کورني ظلم څخه وژغورلې
د امربالمعروف، نهی عن المنکر او شکایتونو اورېدلو وزارت محتسبینو د هېواد په ننګرهار، لغمان، میدان وردګ او بلخ ولایتونو کې د مېرمنو د حقونو خوندیتوب او په ټولنه کې د مېرمنو پر وړاندې د ناوړه پېښو د مخنیوي په موخه ۱۲ مېرمنې، چې د خپلو خاوندانو اود کورنیو د غړو له لوري ور سره ناوړه چلنده کېده او له شدید کورني تاوتریخوالي سره مخ وې ژغورلې او له خپلو شرعي حقونو څخه برخمنې کړې دې.
مسؤلین یې په تړاو وایي: د یادو مېرمنو له جملې، چې ځینې یې له اوږدې مودې راهیسې د خپلو خاوندانو د ناوړه چلند له امله د خپلو پلرونو په کورونو کې اوسېدلې او بې سرنوشته پاتې وې د محتسبینو په هڅو بېرته له خپلو خاوندانو سره یو ځای او له خپلو شرعي حقونو څخه برخمنې شوې.
د یادولو وړ ده، چې د امر بالمعروف، نهی عن المنکر او شکایتونو اورېدلو وزارت محتسبینو د مېرمنو د حقونو د ورکړې او په دې برخه کې د غیر شرعي کړنو د مخنیوي په موخه زرګونه مېرمنې له کورني ظلم، جبري ودونې او کورني بند خونو څخه ژغورلې او زرګونو مېرمنو ته یې د میراث، نفقې، ولور او خپلې خوښې نکاح حقوق سپارلي او په دې پار یې کړنې لا هم روانې دې.
