میدان وردګ کې د (۱۲) کلن کورني تاوتریخوالي قرباني شوې مېرمن د محتسبینو له لوري وژغورل شوه
د امربالمعروف، نهې عن المنکر او شکایتونو اورېدلو وزارت اړوند د میدان وردګ ولایت د جلرېز ولسوالۍ محتسبینو د امیر المؤمنین حفظه الله له لوري د مېرمنو د حقونو ورکړې او ساتنې اړوند د نوي جوړ شوي قانون له مخې یوه مېرمن له دوولس کلن کورني تاوتریخوالي څخه وژغورله.
محتسبین وایي: یاده مېرمن چې د جلرېز ولسوالۍ سنګلاخ درې اوسېدونکې ده، چې له تېرو (۱۲) کلونو راهیسې د خپل خاوند له لوري له ټولو شرعي حقونو څخه بې برخې او له جدي کورني تاوتریخوالي سره مخ وه، د محتسبینو له لوري وژغورل شوه.
ورته مهال د فاریاب او زابل ولایتونو محتسبینو د مېرمنو حقونو ته په ژمنتیا په یوه بل غوره اقدام کې هم دوه مېرمنې له کورني تاوتریخوالي څخه وژغورلې او د کورنیو له غړو یې وغوښتل چې له مېرمنو سره غوره چلند وکړي او د تاوتریخوالي ډکو پېښو له تر سره کولو ډډه وکړي.
د یادولو وړ ده، چې د امربالمعروف، نهې عن المنکر او شکایتونو اورېدلو وزارت محتسبینو تېره اونۍ د هېواد په کچه د مېرمنو د حقونو اړوند (۲۴) قضیې حل کړې دي.
