ننګرهار کې محتسبینو پنځه ټنه تاریخ تېر خوراکي او غیر خوراکي توکي له منځه یو وړل
محتسبینو په ننګرهار ولایت کې په بازارونو کې د نرخونو کنټرول، سود او احتکار د مخنیوي او تاریخ تېر او بې کیفیته موادو د له منځه وړلو په موخه د اړوندو امارتي ادارو په همکارۍ نیږدې پنځه ټنه تاریخ تېر خوراکي او غیر خوراکي توکي را ټول او له منځه یو وړل.
محتسبینو په دې ولایت کې د اړوندو امارتي ادارو سره په همغږۍ له تجارتي ځایونو او هټۍګانو څخه د څارنې پر مهال پنځه ټنه تاریخ تېر او بې کیفیته خوراکي او غیري خوراکي توکي را ټول او له منځه یو وړل.
ورته مهال محتسبینو له سوداګرو او هټۍوالو سره په اصلاحي ناستو کې ټینکار وکړ، چې په ورځنیو سوداګریزو کړنو کې له سود، احتکار، په ترازو کې له خیانت کولو او هغو ټولو کړنو څخه ډډه وکړي چې له اسلامي اصولو سره په ټکر کې وي او زیاته یې کړه تر څو معیاري اجناس بازار ته وړاندې شي او په دې برخه کې د تقلب مخه ونیول شي.
د یادولو وړ ده، چې محتسبین په ټول هېواد کې د خپلو کړنو پر دوام په دوامداره توګه له سوداګرو او هټۍوالو سره ناستې کوي چې ور سره په یاده برخه کې د زیاتو ناوړه کړنو مخه نیول شوې او په دې پار یې کړنې لا هم دوام لري.
