په غزني، پروان او جوزجان ولایتونو کې د امر بالمعروف مسؤلینو درې مېرمنې له غیر شرعي نکاح ګانو څخه وژغورلې
د غزني، پروان او جوزجان ولایتونو د امر بالمعروف مسؤلینو د مېرمنو حقونو ته په ژمنتیا په یادو ولایتونو کې د درې مېرمنو د غیر شرعي نکاح ګانو مخنیوی وکړ او یادې مېرمنې یې له خپلو شرعي حقونو څخه برخمنې کړې.
مسؤلین وایي : یادې مېرمنې چې د بې معنی غیرتونو او ناوړه دودونو په اساس غیر شرعي نکاح ګانو ته مجبورې کړل شوې وې د امر بالمعروف د مسؤلینو له لوري یې مخه ونیول شوه او د کورنیو له غړو یې وغوښتل، چې په راتلونکي کې د داسې ناوړه کړنو له تر سره کولو ډډه وکړي.
دغه راز مسؤلین ډاډ څرګندوي، چې د ټولنې د ټولو دیني ارزښتونو او په ځانګړي ډول د مېرمنو د شرعي حقونو د خوندي ساتلو لپاره به خپلې هڅې لا نورې هم ګړندۍ کړي.
بلخوا ځایي اوسېدونکي دا پرېکړې د ټولنیز عدالت د تأمین، د مېرمنو پر وړاندې له تاوتریخوالي د ډکو پېښو د مخنیوي او په ځانګړي ډول د جبري ودونو د مخنیوي غوره ګام بولي.
