په میدان وردګ ولایت کې د بدل واده جبري نکاح فسخ او مېرمنو ته د شرعي نکاح حق ورکړل شو
د میدان وردګ ولایت د امر بالمعروف ریاست محتسبینو له لوري دوه نجونې چې د یوې بلې په بدل کې په جبري توکه کوژده شوې وې او د دواړو کورنیو تر منځ له اوږدې مودې راهیسې د اوږدمهالو شخړو له امله یادې نجونې د خپلو پلرونو په کورنو ناستې وې او سختو ذهني او رواني فشارونو سره مخ وې وژغورل شوې او د جبري کوژدې فسخ کولو او په خپله خوښه د شرعي او قانوني واده کولو حق ورکړل شو.
د دیني عالمانو او قومي مخورو په منځګړیتوب دواړو کورنیو ته د یادو نجونو پر وړاندې شوی ظلم او ناروا چلند په څرګند ډول بیان کړ او د شرعي او ټولنیزو اصولو په رڼا کې یې د دواړو لوریو ترمنځ روغه جوړه وکړه.
محتسبینو د دیني عالمانو او قومي مخورو په منځګړیتوب د شوې پرېکړې له مخې، دواړو نجونو ته د بدل واده د فسخ کولو او په خپل اختیار په بل مناسب ځای کې د واده کولو شرعي او قانوني حق ورکړ.
