کابل کې د امر بالمعروف مسؤلینو د سحري وسایلو خرڅلاو لوی پټن ځای کشف او په تړاو یې دوه تنه نیولي دي
د امر بالمعروف، نهی عن المنکر او شکایتونو اورېدلو وزارت اړوند د کابل ښاري ریاست محتسبینو د شپږمې حوزې اړوند کوټه سنګي سیمه کې د ځایي اوسېدونکو په همکارۍ هغه دوه تنه نیولي او د شرعي پرېکړې په موخه یې عدلي او قضایي ارګانونو ته ور پېژندلي، چې په پټه یې سحري کتابونه او په کوډو کې کارېدونکي جنسونه خرڅول.
په تړاو یې د دې وزارت ویاند سیف الاسلام خیبر وایي، چې د ځایي خلکو په همکارۍ یې هغه پټن ځایونه کشف او له منځه وړي، چې پکې په لویه کچه سحري وسایل او کتابونه پېر او پلور ته وړاندې کېدل.
نوموړی ټینګار کوي، چې په پوره توان به د هغو ټولو ناوړه کړنو او کارونو مخه نیسي چې په ټولنه کې د خرافاتو ترویج او د غیر شرعي کړنو تر سره کولو ته لار هواروي او خبر داری ورکوي، هغه کسان، چې د وزارت له پالیسۍ سره په ټکر کې کړنې کوي د اصلاح او سمون په موخه به عدلي او قضایي ارګانونو ته ور وپېژندل شي.
د یادولو وړ ده، چې د دې وزارت مسؤلینو په تېره زمري میاشت کې د هېواد په کچه لسګونه کوډګر نیولي او په دې پار یې کړنې لا هم دوام لري.
