کندز کې محتسبینو له دیني عالمانو، سپین ږیرو او ځوانانو سره د ناوړه دودونو د مخنیوي په موخه ناسته وکړه
د کندز ولایت د امر بالمعروف ریاست مسؤلینو د دې ولایت له دیني عالمانو، قومي مخورو او ځوانانو سره په ټولنه کې د ناوړه دودونو د مخنیوي، اسلامي ارزښتونو د ساتنې او د امیر المؤمنین حفظه الله د فرامینو د تطبیق په موخه ناسته وکړه.
د ناستې ګډونوالو ته په خبرو کې د یاد ولایت د امر بالمعروف رئیس الحاج مولوي نجیب الله غفوري د علماوو رول د ټولنې د اصلاح، د شریعت د تطبیق او قوانینو د تنفیذ په برخه کې حیاتي وباله او له دیني عالمانو یې وغوښتل چې په ټولنه کې د ناوړه دودونو د مخنیوي او عامه پوهاوي په برخه کې دې د جمعې د لمونځونو په خطبو او نورو دیني غونډو کې خبرې وکړي.
دغه راز ناستې ته دیني عالمانو، قومي مخورو او ځوانانو د منکراتو د له منځه وړلو، د ښځو سره د تاوتریخوالي د مخنیوي او په ټولنه کې د دیني ارزښتونو د پیاوړتیا په برخه کې خپلې خبرې وکړې او ټینګار یې وکړ، چې د اسلامي ټولنې د سالمې ودې لپاره به په ګډه کار کوي.
ورته مهال د ناستې ګډون والو په دې ولایت کې د محتسبینو کړنې وستایلې او ژمنه یې وکړه چې د شرعي قوانینو په پلي کولو او د منکراتو په مخنیوي کې د محتسبینو تر څنګ ولاړ دي.
