د امر بالمعروف، نهې عنالمنکر او شکایتونو اورېدلو محترم وزیر په نورستان کې د نوي رغول شوي جامع جومات د پرانیستې مراسمو کې ګډون وکړ
د نورستان ولایت د دواب ولسوالۍ د شوک کلي اوسېدونکو د اشغالګرو له لوري ویجاړ شوی جومات د شاؤخوا ۱۵ میلیونه افغانیو په شخصي لګښت بیا رغولی او د امر بالمعروف، نهې عنالمنکر او شکایتونو اورېدلو وزارت وزیر شیخ محمد خالد الحنفي صاحب، ځایي مسؤولینو او ګڼو ځایي ولسونو په شتون کې د لمونځ کوونکو پر مخ پرانیستل شو.
د ځایي مجاهدینو او مشرانو په وینا، یاد جومات د ۲۰۰۸م کال د امریکایي ځواکونو د بمباریو پر مهال سخت زیانمن شوی و او د سیمې مسجد، مدرسه، دیني زده کوونکي او ګڼ شمېر ملکي وګړي شهیدان شوي وو.
هغوی زیاتوي چې د یادو بمباریو په پایله کې لسګونه کورونه بشپړ ویجاړ شوي او نږدې ۱۰۰ تنه ملکي وګړي شهیدان او زخمیان شول.
د امر بالمعروف، نهې عنالمنکر او شکایتونو اورېدلو وزارت وزیر شیخ محمد خالد الحنفي په دې تړاو جوړه شوې ناسته کې وویل، د اسلامي امارت د مدارسو او تعلیمي ادارو د جوړیدو لپاره ځانګړی پام شوي او په تېرو کلونو کې د هېواد په کچه ګڼ شمېر جوماتونه او تعلیمي ادارې جوړې شوې دي.
ښاغلی شیخ صاحب زیاته کړه، چې د الله تعالی شکر دی چې اوسمهال په هېواد کې بشپړ امنيت تامين شوی او ټول افغانان په یووالي او ورورولي کې ژوند کوي.
