کنړ کې محتسبینو له سوداګرو او هټۍوالو سره اصلاحي ناستې وکړې
د کنړ ولایت محتسبینو په بازارونو کې د سود، احتکار، ترازو کې د خیانت کولو د مخنیوي او د نرخونو د کنټرول په موخه د یو شمېر سوداګرو او هټۍوالو سره اصلاحي ناستې وکړې.
محتسبینو په دې بېلا بېلو اصلاحي ناستو کې له سودا ګرو او هټۍوالو سره د سود، احتکار، دوکې، نرخونو کنټرول او له اسلامي احکامو سره د سمې سوداګرۍ په برخه کې سوداګرو او هټۍ والو ته سپارښتنې وکړې او له هغوی یې وغوښتل، ترڅو خپلې چارې له اسلامي اصولو سره سمې تر سره کړي.
بلخوا ځایي اوسېدونکي د نورو اصلاحي کړنو ترڅنګ د محتسبینو دغه کړنې ستایي او له مسؤولینو غواړي چې په بازارونو کې د نرخونو کنټرول، سود او احتکار مخه ونیسي او د وزارت د شویو سپارښتنو د تطبیق په برخه کې جدي کړنې تر سره کړي.
دا په داسې حال کې ده، چې د امر بالمعروف، نهې عن المنکر او شکایتونو اورېدلو وزارت محتسبین د هېواد په ټولو ولایتونو کې ورته اصلاحي کړنې تر سره کوي، چې ور سره په بازارونو کې د منکراتو په کموالي کې د پام وړ بدلون راغلی دی.
