غزني کې د امر بالمعروف مسؤلینو(۶) مېرمنې له کورني ظلمونو څخه وژغورلې
د غزني ولایت د امر بالمعروف مسؤلینو د امیر المؤمنین حفظه الله له لوري د مېرمنو حقونو ته په ژمنیتا او د مېرمنو پر وړاندې د تاوتریخوالي ډکو پېښو د مخنیوي په موخه د یاد ولایت په ګیرو، ګیلان، خواجه عمري، ناوه، ده یک، واغظ او مقر ولسوالیو کې (۶) مېرمنې چې د کورني تاوتریخوالي او ناوړه دودونو په اساس له خپلو شرعي حقونو څخه بې برخې وې له شرعي حقونو څخه برخمنې کړې.
مسؤلین وایي: نوموړې مېرمنې چې ځینې یې له تېرو نهو کلونو راهسيې د ناوړه دودونو پر اساس ځورول کېدلې او له خپلو شرعي حقونو څخه بې برخې وې د امر بالمعروف د مسؤلینو په هڅو وژغورل شوې.
دغه راز مسؤلین ډاډ څرګندوي، چې هېڅ چاته به اجازه ور نکړي چې د مېرمنو حقوق تر پښو لاندې کړي او په پوره توان به د هغو ټولو بدو پېښو مخه نیسي چې له امله یې د مېرمنو حقوق له ګواښ سره مخ کېږي.
د یادولو وړ ده، چې د امر بالمعروف، نهی عن المنکر او شکایتونو اورېدلو وزارت ولایتي مسؤلین په دوامداره توګه له ځایي خلکو سره د مېرمنو د حقونو د ورکړې او په دې تړاو د عامه ذهنیت د سمون په موخه اصلاحي ناستې کوي، چې ور سره په دې برخه کې د پام وړ بدلون راغلی ده.۰
