محتسبینو په میدان وردګ، غزني او هلمند ولایتونو کې اته مېرمنې له کورني تاوتریخوالي څخه وژغورلې
د امر بالمعروف، نهې عن المنکر او شکایتونو اورېدلو وزارت محتسبینو د یاد وزارت له لوري د مېرمنو د حقونو د خوندیتوب په موخه د جوړ شوي قانون له مخې په غزني، میدان وردګ او هلمند ولايتونو کې اته مېرمنې له کورني تاوتریخوالي څخه وژغورلې.
د محتسبینو په وینا: یادې مېرمنې چې له اوږدې مودې راهیسې د خپلو کورنیو له لوري د فزیکي او رواني تاوتریخوالي سره مخ وې، د محتسبینو په هڅو وژغورل شوې او د کورنیو له غړو څخه یې وغوښتل شول چې په راتلونکي کې د داسې کړنو له تر سره کولو ډډه وکړي چې د مېرمنو حقوق له ګواښ سره مخ کوي.
محتسبین ډاډ څرګندوي، چې د مېرمنو د حقونو د خوندیتوب او ساتنې اړوند د امیرالمؤمنین حفظه الله په امر د جوړ شوي قانون له مخې د خویندو ټولو شرعي حقونو ورکړې او خوندیتوب ته ژمن دي او هیڅ چاته به اجازه ور نه کړي چې د مېرمنو حقوق تر پښو لاندې کړي.
