مولوي عارف: د حق داعي باید د حیا په عالي صفت موصوف وي
شنبه، ذالقعده ۱۱، ۱۴۴۳
د امر بالمعروف،نهی عن المنکر او شکایتونو اورېدلو وزارت د محتسبینو د اصلاح او روزنې رئیس مولوي محمد یحیی عارف دکابل ښار اوومې حوزې محتسبینو سره ولیدل، او هغوی ته یې د حق د داعي صفتونه بیان او د دعوت د ټولو اصلو پلي کولو ته يې متوجه کړل.
د اصلاح او روزنې رئیس محتسبینو ته وویل: موږ اوتاسې ته لوی مسؤلیت متوجه دی او دا مسؤلیت باید هغسي ادا شي لکه څنګه چې پیغمبرانو ادا کړی دی دعوت د انبیاءعلهم السلام وظیفه وه او د ټولنې د سمون تر ټولو غوره لار دعوت دی چې باید په احسنه طریقه خلکو ته وړاندې شي .
ښاغلي عارف همدارنګه زیاته کړه چې د حق داعي باید د حیا په عالي صفت موصوف وي او د ټولنې له پاره مثال وي ځکه په دې سره په ټولنه کې د داعي دعوت مؤثر وي او داعي لومړی باید هغه اصول او قوانین پر ځان تطبیق کړي چې په ټولنه کې یې د تطبیق غوښتونکی دی.
دغه راز یې محتسبینو ته په خبرو کې وویل چې د حق د داعي دعوت باید د امربالمعروف وزارت د ورکړل شویو فرمانونو پوري محدود نه وي بلکي عامو خلکو او مجاهدینو ته د رسول الله صلی الله علیه وسلم او صحابه کرامو کړه وړه او د ژوند طریقه بیان کړي او ورته وښیي چې د ژوند د پرمخ بیولو له پاره تر ټولو غوره طریقه همدا ده ده.
هغه دغه راز زیاته کړه چې د حق داعي باید ذکي او هوښیار وي او په دعوت کې د هغو موضوعاتو له یادولو ډډه وکړي چې په ټولنه کې د نفرت او مخالفت کولو سبب ګرځي او داعي باید د عوت د انحصار سبب و نه ګرځي او هر هغه چاته اجازه ورکړي چې د ټولنې د سمون فکر ورسره وي .
