په غزني ولایت کې دوه مېرمنې د هغوی له خوښې پرته له نکاح ورکولو څخه وژغورل شوې
د امربالمعروف، نهې عن المنکر او شکایتونو اورېدلو وزارت اړوند د غزني ولایت محتسبینو د مېرمنو حقونو ته په ژمنتیا د دې ولایت په قره باغ او اجرستان ولسوالیو کې دوه مېرمنې له اجباري نکاح څخه وژغورلې.
یادې مېرمنې، چې د ناوړه دودونو او زیاتو پیسو په بدل کې د هغوی له خوښې پرته په نکاح ورکول کېدلې او د کورنیو د غړو له لوري ناوړه چلند ور سره کېده د محتسبنیو له لوري له کورني تاوتریخوالي او اجباري نکاحو څخه وژغورل شوې.
بلخوا ځایي اوسېدونکي په ټولنه کې د معروفاتو اقامې، منکراتو مخنیوي او د مېرمنو له شرعي حقونو دفاع او ورکړې په برخه کې د محتسبینو کړنې ستایي او ډاډ څرګندوي، چې له دې سره به په ټولنه کې د زیاتو ناوړه دودونو او غیر شرعي کړنو مخه ونیول شي.
دا په داسې حال کې ده، چې د امر بالمعروف، نهې عنالمنکر او شکایتونو اورېدلو وزارت د مېرمنو د حقونو خوندیتوب خپل لومړیتوب ګڼي او ډاډ څرګندوي، چې هېڅ چا ته به اجازه ورنه کړي، څو د مېرمنو حقونه تر پښو لاندې کړي.
