شیخ محمد خالد الحنفي د ترکيې هېواد د (مسک میډیا) رسنۍ له مسؤول سره په خپل کاري دفتر کې ولیدل
د امر بالمعروف، نهې عن المنکر او د شکایتونو اورېدلو وزارت سرپرست وزیر شیخ محمد خالد الحنفي صاحب د ترکیې هېواد د (مسک میډیا) رسنۍ له استازي اویس چلبي عراقي او مل پلاوي سره په خپل کاري دفتر کې ولیدل.
په دغه لیدنه کې ښاغلي عراقي د اسلامي امارت په ځانګړي ډول د امر بالمعروف، نهې عن المنکر او د شکایتونو اورېدلو وزارت لاسته راوړنې او پرمختګونه په کم وخت کې د ستایلو وړ وبلل او زیاته یې کړه، چې تل یې هڅه کړې چې نړۍ ته د اسلامي امارت رښتینی انځور وړاندې او د غرب له شومو پلانونو چې د اسلامي امارت پر وړاندې يې ترسره کوي نړۍ خبره کړي.
دغه راز ښاغلي عراقي د منکراتو په مخنیوي، معروفاتو د اقامې، شکایتونو اورېدلو او حل په برخه کې د یاد وزارت کړنې وستایلې او زیاته یې کړه؛ دا د خوښۍ ځای دی چې په ننني عصر کې اسلامي امارت د اسلامي نظام رښتینی انځور نړیوالو ته وړاندې کوي.
بلخوا بیا د امر بالمعروف وزارت سرپرست وزیر ښاغلي حنفي صاحب د ښه راغلاست تر څنګ د نوموړو له همدردۍ او مرستې چې اسلامي امارت سره یې کوي مننه وکړه او د امربالمعروف، نهې عن المنکر او د شکایتونو اورېدلو وزارت لاسته راوړنې چې د منکراتو د مخنیوي، معروفاتو د اقامې، هېواد والو د ستونزو اورېدلو او حل په برخه کې ترسره کړي شریکې کړې او وې ویل چې د امر بالمعروف وزارت د هېواد والو په ځانګړي ډول د ښځو حقونو ته ژمن دی او تل یې په دې برخه کې هڅې کړي چې د یوه هېواد وال حق هم ضایع نه شي.
ښاغلي حنفي صاحب همدا راز زیاته کړه چې اسلامي امارت له نړۍ نور څه نه غواړي فقط دومره چې د دوي په اړه دې ناسم قضاوت نه کوي او هغه څه دي خلکو ته وښايي چې د اسلامي امارت رښتینی انځور دی.
د یادولو ده چې تر دې وړاندې هم ګڼ شمېر بهرني سیاستوال، دیني عالمان، تجاران او نورو بهرنيو وګړو له ښاغلي حنفي صاحب سره لیدلي او د بشپړې همکارۍ ډاډ یې ورکړی.
