د امر بالمعروف، نهې عنالمنکر او شکایتونو اورېدلو وزارت سرپرست وزیر سمنګان ته سفر وکړ
د امر بالمعروف، نهې عنالمنکر او شکایتونو اورېدلو وزارت سرپرست وزیر شیخ محمد خالد الحنفي صاحب د یو رسمي سفر په ترڅ کې سمنګان ولایت ته ولاړ او هلته یې د امیر المؤمنین حفظه الله د فرمانونو، حکمونو او لارښوونو د لا ښه پلي کېدو او عامه پوهاوي په موخه د دې ولایت له ځایي مسؤولینو، علماء کرامو، خطیب صاحبانو، قومې مخورو او ګذر وکیلانو سره وکتل.
د امر بالمعروف، نهې عنالمنکر او شکایتونو اورېدلو وزارت سرپرست وزیر شیخ محمد خالد الحنفي صاحب په خپلو خبرو کې وویل: امریکا خپلو موخو ته د رسېدو لپاره د هېڅ قانون حتا خپلو قوانینو پلوي نه کوي او په هر ډول کړنو لاس پورې کوي، نوموړي زیاته کړه چې امریکا او ملاتړو یې له هر ډول لارو چارو کار واخیست ترڅو افغان مجاهدین له جهاد څخه منع کړي، مګر افغانانو د خپل ځان په قربانولو سره له شل کلنې مبارزې وروسته د جهاد ثمره ترلاسه کړه او اسلامي نظام حاکم شو.
ښاغلي الحنفي ټینګار وکړ چې اسلامي حکومت د ټولنې حکومت دی او د ټولو افغان وګړو پر مخ یې غېږه خلاصه ده، د اسلامي امارت له راتګ سره هممهال زورواکي، قومي او ژبني تعصب ته د پای ټکی کېښودل شو او ویې ویل: قومونه او ژبې د دې لپاره دي ترڅو یو بل سره وپېژنو، هېڅ افغان وګړی له بل وګړي څخه هغه که د هرې ژبې او قوم وي پورته نه دی؛ ټول افغانان سره وروڼه دي.
نوموړي زیاته کړه، چې ټول مسؤولین او علماء مکلف دي تر څو په ملکي او نظامي ادارو او ټولنه کې د مشرتابه له لوري صادر شوي فرمانونه، حکمونه او لارښوونې پلي کړي او ویې ویل: ټول علماء دنده لري ترڅو د امر بالمعروف او نهې عنالمنکر له لارې د ټولنې او نظام په اصلاح کې برخه واخلي.
ورته مهال ځایي مسؤولینو وویل: امر بالمعروف او نهې عنالمنکر د اسلامي نظام د ملا د تير حیثیت لري او ټولنې ته روحي او معنوي پیاوړتیا وربخښي.
نوموړو همدارنګه ډاډ ورکړ چې د اسلامي امارت مشرتابه له لوري صادر شوو فرمانونو، حکمونو او لارښوونو پلي کولو ته ژمن دي او یاده برخه کې به بشپړه هڅه کوي.
هېره دې نه وي چې ښاغلي وزیر صاحب د یوې جلا ليدنې په ترڅ کې د یاد ولایت مرکز او ولسوالیو محتسبینو سره هم وکتل او هغوی ته یې د چارو ښه مخته وړلو او همغږۍ په موخه لازمې لارښوونې او سپارښتنې وکړې.
