لغمان کې محتسبینو د یوې جبري نکاح مخه نیولې او بلې مېرمنې ته یې د مهر حق ورسپارلی
د لغمان ولايت محتسبینو د یوې مېرمنې د جبري نکاح مخه نیولې ده او په یو بل اقدام کې یې د یوې مېرمنې د مهر حق هغې ته ورسپارلی دی.
د لغمان ولایت د امر بالمعروف، نهې عن لمنکر او شکایتونو اورېدلو رياست مسؤولین وایي چې د یوې مېرمنې له شکایت وروسته یې د هغې د جبري نکاح مخه نیولې ده د هغوی په وینا، یاده نجلۍ خپل پلار د هغې له خوښې پرته خپل تره زوی ته په نکاح ورکړې وه چې د موضوع د څېړلو لپاره د دواړه کورنۍ راوغوښتل شوې او د مېرمنو د حقونو په تړاو له بشپړو معلوماتو ورکولو وروسته د نوموړې له جبري نکاح څخه مخنیوی وشو.
همداراز د یاد ولایت محتسبینو په يوه بل جلا اقدام کې د یوې مېرمنې د مهر حق چې د کورنۍ له لوري خوړل شوی و، بېرته واخيستل شو او مېرمنې ته وسپارل شو.
د لغمان ولایت د امر بالمعروف، نهې عنالمنکر او شکایتونو اورېدلو ریاست مسؤولین ټینګار کوي چې هېڅوک حق نه لري يوه بالغه او عاقله مېرمن د هغې له خوښې پرته په نکاح ورکړي او یا هم د هغوی حقونه تر پښو لاندې کړي.
بلخوا ځایي اوسېدونکي د مېرمنو د حقونو خوندیتوب په برخه کې د محتسبینو هڅې ستایي او پر دې باور دي چې ورته کړنې ټولنه کې اصلاح راولي او اسلامي ارزښتونه پیاوړي کوي.
دا په داسې حال کې ده چې د امر بالمعروف، نهې عنالمنکر او شکایتونو اورېدلو وزارت محتسبینو د تېرکال په اوږدو کې د څه باندې (۱۰۰۰) جبري نکاحو مخنیوی ترسره کړی دی.
