هلمند کې د یوې مور په ګډون دوه لوڼې له کورني بند څخه ازادې شوې
د هلمند ولایت محتسبینو د خپلو هڅو په دوام او د مېرمنو د شرعي حقونو د خوندیتوب په موخه د دې ولایت په خانشین ولسوالۍ کې د یوې مور په ګډون دوه لوڼې د خپلو ترونو له فزیکي ځورونې، کورني ظلم او تاوتریخوالي څخه وژغورلې.
په دې تړاو د یاد ولایت محتسبین وایي: یاده کونډه مېرمن چې له خپلو دوو لوڼو سره له اوږدې مودې راهیسې د خپل خاوند د وروڼو او د نجونو د ترونو له لوري له فزیکي او رواني ځورونې او کورني تاوترخوالي سره مخ وې د محتسبینو له لوري وژغورل شوې او له خپلو شرعي حقونو څخه برخمنې شوې.
د محتسبینو په وینا: یادې نجونې چې د خپلو ترونو له لوري له ناوړه چلند سره مخ وې او یوه میاشت په کورني بند کې ساتل شوې وې د محتسبینو له لورې له کورني بند څخه ازادې شوې.
محتسبین ډاډ څرګندوي، چې په پوره توان به د مېرمنو له شرعي حقونو څخه دفاع کوي او د هغو ناسمو روایتونو مخه به نیسي چې د مېرمنو شرعي حقوق له ګواښ سره مخ کوي.
