کنړ کې د محتسبینو په هڅو د غیر شرعي نکاح پر سر را پورته شوې دښمني حل شوه
د کنړ ولایت د امر بالمعروف، نهی عن المنکر او شکایتونو اورېدلو ریاست محتسبینو د ټولنیز عدالت د تأمین او د مېرمو د شرعي حقونو د ورکړې په موخه په دې ولایت کې د دوو کورنیو تر منځ د غیر شرعي نکاح پر سر راپورته شوې دښمني چې د ګڼو کورنیو ستونزو لامل شوې وه حل کړه.
په دې تړاو د یاد ولایت د امر بالمعروف مسؤلین وایي: یاده دښمني، چې د دوو کورنیو ترمنځ د اجباري نکاح پر سر راپورته شوې وه، چې د نجلۍ پلار خپله لور چې یو ځل یې بل چاته په شرعي نکاح ور کړې وه، اوس یې غوښتل چې په نجلۍ باندې په جبري توګه نکاح فسخه کړي او په جبري توګه یې بل چاته په نکاح کړي، چې د محتسبینو په هڅو او د قومي مخورو په منځګړیتوب د دې ناوړه پېښې مخه ونیول شوه او دښمني حل شوه.
د یادولو وړ ده، چې د امر بالمعروف وزارت محتسبینو د هېواد په کچه د مېرمنو د حقونو پر سر د راپورته شوو سلګونو شخړو مخه نیولې او ډاډ څرګندوي، چې هېڅ چاته به اجازه ور نکړي چې د مېرمنو شرعي حقوق تر پښو لاندې کړي او پر وړاندې یې له تاوتریخوالي ډک چلند څخه کار واخلي.
