ننګرهار کې محتسبینو د مېرمنو د حقونو اړوند (۴۷) بېلابېلې قضیې حل کړې دې
د ننګرهار ولایت د امر بالمعروف، نهی عن المنکر او شکایتونو اورېدلو ریاست محتسبینو د دې ولایت په مرکز او ولسوالیو کې د مېرمنو حقونو ته په ژمنیتا او د امیر المؤمنین حفظه الله د شپږ ماده یز فرمان سره سم د مېرمنو د حقونو اړوند(۴۷) بېلابېلې قضیې حل کړې دې.
په دې تړاو د یاد ولایت د امر بالمعروف مسؤلین وایي، چې په تېره عقرب میاشت کې یې په مرکز او ولسوالیو کې د مېرمنو د حقونو لکه میراث، ولور، نفقې، کورني تاوتریخوالي، کورني بند، جبري نکاح ګانو او نورو اړوندو برخو کې (۴۷) قضیې حل کړې دې.
د هغوی په وینا، چې محتسبینو یې په ټولنه کې د خرافاتو د مخنیوي او د اخلاقي سمون په موخه دوه تنه ماهر کوډګر هم نیولي، چې د شرعي حدودو د تطبیق او نورو څېړنو په موخه یې عدلي او قضایي ارګانونو ته ور پېژندلي دې.
