خوست کې یوې مېرمنې د محتسبینو په مرسته شل کاله وروسته د نکاح شرعي حق تر لاسه کړ
د خوست ولایت د امر بالمعروف، نهی عن المنکر او شکایتونو اورېدلو ریاست مسؤلینو د دې ولایت په باک ولسوالۍ کې یوه مېرمن چې له تېرو (۲۰) کلونو راهیسې د نکاح له شرعي حق څخه بې برخې وه د محتسبینو په هڅو له اوږده محرومیت څخه وژغورل شوه او د نکاح شرعي حق یې تر لاسه کړ.
په دې تړاو د یاد ولایت د امر بالمعروف مسؤلین وایي: یاده مېرمن چې د خپل پلار له لوري شل کاله وړاندې په کوچینوالي کې په بدو کې ورکړل شوې وه، چې د خسرګنۍ له لوري معلقه پاتې شوې وه او خاوند یې هم معلوم نه و د محتسبینو په هڅو له اوږد مهاله محرومیت څخه خلاصه او له خپلو شرعي حقونو څخه برخمنه شوه.
مسؤلین زیاتوي: د مېرمنو خوښه په نکاح کې د هغوی شرعي حق دی، چې باید ترې برخمنې شي، چې په وینا یې: «هیڅ چاته به اجازه ور نه کړو، چې د مېرمنو حقوق تر پښو لاندې کړي او د هغو پېښو مخه به نیسو چې د مېرمنو حقوق ګواښي».
بل خوا ځایي اوسېدونکي په ټولنه کې د معروفاتو اقامې، منکراتو مخنیوي او د مېرمنو له شرعي حقونو دفاع او ورکړې په برخه کې د محتسبینو کړنې ستایي او ډاډ څرګندوي چې له دې سره به په ټولنه کې د زیاتو ناوړه دودونو او غیر شرعي کړنو مخه ونیول شي.
