د امر بالمعروف، نهی عن المنکر او شکایتونو اورېدلو وزارت په اونۍ کې
د امر بالمعروف، نهی عن المنکر او شکایتونو اورېدو وزارت مسؤلینو د اسلامي ارزښتونو د پالنې، مېرمنو د حقونو خوندیتوب، د قومي او ژبني دښمنیو د حل، ټولنیز عدالت د ټینګښت او د ټولنیز اخلاقي سمون لپاره د ټاکل شوې پالیسي پر اساس د ټولنیز سمون په موخه کړنې تر سره کړې دي.
د امر بالمعروف وزارت له لوري له ولسونو سره د همغږۍ ناسته:
د امر بالمعروف، نهي عن المنکر او شکایتونو اورېدلو وزارت او د کابل ولایت مقام له لوري په دې اونۍ کې د کابل ولسونو سره د معروفاتو د اقامې او منکراتو د ازالې په موخه د همغږۍ ناسته وشوه .
د رواني ناروغانو راټولونه:
د امر بالمعروف وزارت محتسبینو په جوزجان او بدخشان ولایتونو کې د امیرالمؤمنین حفظهالله د حکم د تطبیق او د ټولنې د روغتیا د تأمین په موخه په روانه اونۍ کې، ۱۷۴ تنه هغه کسان چې د رواني اختلالاتو له ناروغۍ ځورېدل راټول او د درملنې لپاره یې د یادو دوو ولایتونو د سره میاشت اړوندو ریاستونو ته وروپېژندل.
د مېرمنو حقونو ته رسېدنه:
د امر بالمعروف، نهی عن المنکر او شکایتونو اورېدلو وزارت محتسبینو په دې اونۍ کې د مېرمنو د حقونو اړوند (۵۱) بېلابېلې قضیې حل کړې دي، چې په دې قضیو کې (۲۱) د کورني تاوتریخوالي، (۶) د میراث، (۸) د غیر شرعي نکاح ګانو، (۵) د ولور، (۵) د نفقې نه ورکولو او پاتې (۶) د طلاق قضیې حل شوې دي.
د قومي دښمنیو حل:
محتسبینو په ټولنه کې د قومي او ژبني تعصباتو د مخنیوي او د یووالي روحیې د پياوړې کولو لپاره د هېواد په کچه (۷) لویې دښمنۍ او (۲۸) وړې شخړې حل کړې دي.
د کوډګرو نیول:
د امر بالمعروف، نهی عن المنکر او شکایتونو اورېدلو وزارت محتسبینو په ټولنه کې د ناوړه دودونو د مخنیوي، ټولنیز عدالت د تأمین او د خرافاتو د مخنیوي په موخه (۹) تنه کوډګر نیولي او د شرعي پرېکړې په موخه یې، عدلي او قضایي ارګانونو ته ور پېژندلي دي.
