د امر بالمعروف، نهې عنالمنکر او شکایتونو اورېدلو وزارت وزیر بلخ ته سفر وکړ
د امر بالمعروف، نهې عنالمنکر او شکایتونو اورېدلو وزارت وزیر شیخ الحدیث محمد خالد الحنفي صاحب د امر بالمعروف او نهې عنالمنکر قانون لا ښه پلي کېدو، د ناوړه دودونو مخنیوي، د خلکو د ستونزو اورېدلو، معروفاتو اقامې او منکراتو مخنیوي، همغږۍ او عامه پوهاوي په موخه بلخ ولایت ته ولاړ او د یوې غونډې په ترڅ کې یې د دې ولایت له ملکي او نظامي مسؤولینو، علماء کرامو، قومې مشرانو، ګذر وکیلانو او ګڼ شمېر ځوانانو او زده کړیالانو سره وکتل.
په دې تړاو جوړه شوې ناسته کې، چې د سيمه ییزو مسؤولينو ترڅنګ د نظامي محکمې مرستیال او د امیرالمؤمنین حفظه الله استازو هم ګډون درلود د امر بالمعروف، نهې عنالمنکر او شکایتونو اورېدلو وزارت وزیر شیخ الحدیث محمد خالد الحنفي صاحب د امر بالمعروف او نهې عنالمنکر پر ارزښت وغږېد او ویې ویل: د اسلامي شريعت پر سر چاسره معامله نه کوو او خپلې چارې ټولې د خپل شرعي قانون سره سمې مخته وړو.
شیخ صاحب الحنفي زیاته کړه چې په تېرو کلونو کې د ناوړه دودونه له امله د ټولنې ډېری وګړي په ځانګړې توګه خویندې له خپلو حقونو بې برخې وې او ټینګار یې وکړ چې د امر بالمعروف وزارت په ټولنه کې د ناوړه دودونو له منځه وړلو ته ژمن دی او هیچا ته به اجازه ورنکړل شي ترڅو په ناوړه او شریعت خلاف کړنو لاس پورې کړي.
شیخ صاحب همدا راز د خپلو خبرو په دوام کې له محتسبینو وغوښتل ترڅو په خپلو دعوتي او اصلاحي چارو کې له نرمښت او غوره چلند کار واخلي او که چرته مسؤولین منکرات ترسره کوي له هغوی سره نرمي نه ده په کار، باید تیروتنو ته یې پام ور واړوو.
شیخ صاحب همداراز له ځایي مسؤولینو، قومي مشرانو او دیني عالمانو وغوښتل، چې د امر بالمعروف او نهې عنالمنکر قانون پلي کولو او تر نورو رسولو کې له یاد وزارت سره مرسته وکړي.
ورته مهال ځایي مسؤولینو، قومي مشرانو او دیني عالمانو په خپلو خبرو کې د ټولنې اصلاح او مثبت فکري بدلون کې د امر بالمعروف وزارت ونډه اساسي وبلله او ډاډ یې ورکړ چې د امر بالمعروف او نهې عنالمنکر قانون پلي کولو ته ژمن دي او یاده برخه کې به بشپړه هڅه کوي.
هېره دې نه وي په یاده ناسته کې د امر بالمعروف او نهې عنالمنکر قانون په تطبیق کې د علماوو د همکارۍ په تړاو د عاليقدر امیرالمؤمنین حفظه الله فرمان هم په دواړو ملي ژبو ولوستل شو.
