بغلان کې محتسبینو دوه کسان د شرابو څښلو او خرڅلاو په جرم نیولي دې
د بغلان ولایت د امربالمعروف، نهی عن المنکر او شکایتونو اورېدلو ریاست مسؤلینو د قانون د ۲۲ مې مادې، ۱۱ مې فقرې او د اميرالمؤمنين حفظه الله د ۱۳ مې ګڼې فرمان له مخې د دې ولایت په چهل غوري سیمه کې دوه کسان د نشه یي الکولي موادو یا شرابو د کارولو او پلور په جرم نیولي او د شرعي پرېکړې په موخه یې عدلي او قضایې ارګانونو ته ور پېژندلي دې.
د دې ولایت محتسبین وایي: یاد دوه کسان، چې په پټه یې په سیمه کې د شرابو د پلور کاروبار تر سره کاوه او پخپله یې هم کارول د محتسبینو له لوري ونیول شول او د لا نورو څېړنو په موخه عدلي او قضایي ارګانونو ته ور وپېژندل شول.
بلخوا ځایي اوسېدونکي د محتسبینو دا کړنه ستایي او له هغوی غواړي، چې د نشه یي توکو د مخنیوي په برخه کې لا هم چټک ګامونه واخلي، چې تر څو پوري ځوانان د دې ناوړه عمل له کولو ډډه وکړي.
دا په داسې حال کې ده، چې د دې وزارت مسؤلینو تر دې وړاندې هم د هېواد په ځینو ولایتونو کې د نشه یي توکو د کرکېلې او کارونې مخه نیولې او ډاډ څرګندوي، چې هېڅ چا ته به اجازه ور نه کړل شي چې د یادو توکو په کښت، خرڅلاو او قاچاق لاس پورې کړي.
